苦海女神龍

苦海女神龍

(原曲：港町ブルース)

演唱：西卿
作詞：黃俊雄
作曲：猪俣公章

無　  情   的  太     陽， 可    恨  的  沙   漠，
bô-tsîng ê thài iông  khó hūn ê sua-bo̍k

迫     阮    滿    身 的    汗     流   甲    澹      糊     糊，

pik gún muá sin ê kuānn lâu kah tâm-kôo-kôo

拖        著    沉     重   的  跤     步， 欲     走       千   里  路    途，

thua-tio̍h tîm-tāng ê kha-pōo  beh tsáu tshian-lí lōo-tôo

阮    為  何，為  何   淪   落    江      湖， 為  何   命    遮     薄。

gún uī-hô   uī-hô lûn lo̍h kang-ôo    uī-hô miā tsiah po̍h

有   情       風     吹      動，  三       尺     烏    頭      毛，

ū-tsîng hong tshe tōng sann tshioh oo thâu-mn̂g

有   情     月    照     阮 的   胸       前       半      身   光，

ū-tsîng ge̍h tsiò gún ê hing-tsîng puànn-sin kng

流     浪    著       千    里  遠， 無  一 个 相      借       問，

liû-lōng tio̍h tshian-lí hn̄g  bô tsi̍t ê sio-tsioh-mn̄g

心       頭     酸， 心     酸    孤        單   女，為  何   命  如    此。

sim-thâu sng   sim-sng koo-tuann lú    uī-hô miā lû-tshú

討    厭  交    男    子，  歡       迎  女   朋    友，

thó-ià kau lâm-tsú  huan-gîng lú pîng-iú

討    厭  文      雅  幼  秀      歡    喜  學     風    流，

thó-ià bûn-ngá iù-siù huann-hí o̍h hong-liû

無    人        像       我    這      款， 心      頭     亂     亂     想，

bô lâng tshiūnn guá tsit khuán sim-thâu luān luān siūnn

啉      雄       酒，   怎        樣    啉     雄      酒，愈  啉 愈 憂    愁。

lim hiông tsiú  tsuánn-iūnn lim hiông tsiú   lú lim lú iu-tshiû

為   啥        人    酒     醉， 為   啥        人  迷     茫，

uī siánn-lâng tsiú-tsuì    uī siánn-lâng bê bông

淪    落   在 異    鄉   的    苦      海 女 神    龍，

lûn lo̍h tsāi ī-hiong ê khóo-hái lú sîn liông

毋     願     做   女   紅        妝，   偏      扮    做   女    紅      妝，

m̄-guān tsuè lú hông tsong phian pān tsuè lú hông tsong

醉      茫        茫，    怎        樣     醉     茫       茫， 無    奈 的  女   郎。

tsuì bông bông tsuánn-iūnn tsuì bông bông  bû-nāi ê   lú lông

烏    暗   路  也  著      行，  賭    窟   也  著      行，

oo-àm lōo iā tio̍h kiânn tóo khut iā tio̍h kiânn

人     生 的  六  字   變    化   失   去    了   性     命，

lîn-sing ê lio̍k lī piàn-huà sit-khì liáu sìnn-miā

我    毋  是 小  娘       囝， 我    就  是 女  妖      精，

guá m̄  sī sió niû-kiánn  guá tsiū sī lú iau-tsiann

嘆      一      聲，  生     成    這       款     命， 媠    人   無  媠   命。

thàn tsi̍t siann  sinn-sîng tsit khuán miā   suí lâng bô suí miā

放         捒   著    流    浪， 願      做    好  娘       囝，

pàng-sak tio̍h liû-lōng guān tsuè hó niû-kiánn

無      情   的    環        境   迫    阮   墜    落  烏    暗    城，

bô-tsîng ê khuân-kíng pik gún tuī-lo̍h oo-àm siânn

風        塵 的 女  妖      精，   啥       人    欲      娶      做    某       囝，

hong-tîn ê  lú iau-tsiann siánn-lâng beh tshuā tsuè bóo-kiánn

嘆      一      聲，  生     成    這       款     命， 媠    人   無   媠   命。

thàn tsi̍t siann  sinn-sîng tsit khuán miā   suí lâng bô suí miā