淡水暮色

淡水暮色

演唱：洪一峰
作詞：葉俊麟
作曲：洪一峰

日    頭       將      欲    沉   落   西， 水    面    染      五       彩，

li̍t-thâu tsiong beh tîm lo̍h sai   tsuí-bīn liám ngóo-tshái

男    女 老 幼 咧    等    待， 漁    船   倒   轉     來，

lâm-lú ló iù teh tán-thāi   hî-tsûn tò-tńg--lâi

桃    色  樓      窗      門      半      開，  琴       聲     訴  悲 哀，

thô sik lâu thang mn̂g puàn khai  khîm siann sòo pi-ai

啊～ 幽  怨  的 心     情     無    人    知。

ah    iu uàn ê sim-tsîng bô lâng tsai

朦          朧    月    色    白    光       線，  浮     出    紗   帽      山，

bông lông ge̍h-sik pe̍h kng-suànn phû tshut Se-bō-suann

河   流   水    影   色    變       換， 海      風      陣     陣      寒，

hô lâu tsuí iánn sik piàn-uānn  hái-hong tsūn tsūn kuânn

一      隻    小    鳥     揣   無        伴，   歇    在     船      頭      岸，

tsi̍t tsiah sió tsiáu tshē bô phuānn hioh tsāi tsûn-thâu huānn

啊～ 美     妙  的 啼  叫     動     心       肝。

ah    bí-miāu ê thî kiò tāng sim-kuann

淡        水     黃       昏  帶 詩意，夜 霧  罩  四   邊，

Tām-tsuí hông-hun tài si-ì     iā bū tà  sì-pinn

教      堂     鐘       聲    心      空     虛，  響     對  海   面   去，

kàu-tn̂g tsing siann sim khang-hi  hiáng tuì hái-bīn khì

埔       頂    燈      光   真  稀  微，  閃     閃        像         天        星，

poo tíng ting-kng tsin hi-bî   siám siám tshiūnn thinn tshinn

啊～  難       忘  的  情       景   引  心  悲。

ah    lân-bōng ê tsîng-kíng ín sim pi